Azərbaycandakı sanatoriyalarda dincəlmək neçəyə başa gəlir? - QİYMƏTLƏR
21 İYUN 2016
3608

Azərbaycandakı sanatoriyalarda dincəlmək neçəyə başa gəlir? - QİYMƏTLƏR

"Bu il 70 min nəfərdən artıq vətəndaşın sanatoriya-kurort müəssisələrində dincəlməsi üçün yollayışlardan istifadə edəcəyi gözlənilir".

Fins.az bildirir ki, bunu Trend-ə Azərbaycan Həmkarlar İttifaqları Konfederasiyasının (AHİK) mətbuat və ictimaiyyətlə əlaqələr şöbəsinin müdiri Nazim Ağamirov deyib.

Azərbaycan həmkarlar ittifaqları təşkilatlarının hər il olduğu kimi, bu il də yay mövsümünə ciddi şəkildə hazırlaşdığını deyən N.Ağamirov bildirib ki, sanatoriya-kurort müəssisələrinin böyük əksəriyyətində təmir-abadlıq işləri aparılıb, "lüks" və "yarımlüks" tipli nömrələrin sayı artırılıb, yeni idman qurğuları quraşdırılıb.

N.Ağamirov deyib ki, 2015-ci ildə həmkarlar ittifaqları təşkilatları tərəfindən 8 sanatoriya, 1 müalicə pansionatı və 10 istirahət bazasına yollayışlar verilib. Sanatoriyaların 6-sı ilboyu, digər 2-si, müalicə pansionatı və istirahət bazaları mövsümi fəaliyyət göstərib.

Sanatoriyalara və istirahət mərkəzlərinə yollayışların qiymətinə gəldikdə, N.Ağamirovun sözlərinə görə, ötən illə müqayisədə yollayışların qiymətində, demək olar, dəyişiklik baş verməyib. Bu il yollayışların qiyməti 570 manatdan 750 manatadəkdir. Yollayışlarda qiymət fərqi bir qayda olaraq yataq otaqlarının şəraiti ilə bağlıdır.

Konfederasiya rəsmisi əlavə edib ki, sanatoriya və istirahət evlərinə yollayışlar məcburi dövlət sosial sığortasına cəlb olunan və digər yollayış almaq hüququ olan şəxslərə verilir. Həmin şəxslər yollayışı dəyərinin 15%-ni ödəməklə əldə edirlər. Yollayışların ümumi sayının 10 faizi isə işçilərə (aztəminatlı ailələrə, müharibə iştirakçılarına, əlil, şəhid ailələrinə və s.) ümumiyyətlə tam güzəştlə pulsuz verilir:

"İşçilər iş yerlərində, tələbələr isə təhsil aldıqları müəssisələrdə həmkarlar ittifaqı komitələrinə ərizə ilə müraciət edərək yollayışlar ala bilərlər. Müəssisələrin həmkarlar ittifaqı komitələri, onların xüsusi komissiyaları yollayışlara daha çox ehtiyacı olanları müəyyən edir və işçilərin təqdim etdikləri tibbi arayışa uyğun olaraq müvafiq yollayışlarla təmin edir. Məcburi dövlət sosial sığorta haqqı ödəyən şəxs ailə üzvü üçün də yollayış almaq istəyirsə və ailə üzvü də məcburi dövlət sosial sığorta haqqı ödəyirsə, onda həmin ailə üzvü üçün də yollayışın dəyərinin 15%-ni ödəyir. Əgər işləmirsə, məcburi dövlət sosial sığorta haqqı ayırmaları ödəmirsə, yollayışı dəyərinin 50%-ni ödəməklə əldə edə bilər. Həmkarlar itifaqı təşkilatlarının vətəndaşlara yollayışları tam dəyəri ödənilməklə də vermək hüququ var".

N.Ağamirov deyib ki, 2015-ci ildə Dövlət Sosial Müdafiə Fondunun vəsaiti hesabına 22 min nəfərdən artıq həmkarlar ittifaqı üzvü yollayışlardan istifadə edib. Bundan əlavə, Həmkarlar ittifaqı təşkilatlarının daxili imkanları hesabına 47 min nəfərdən artıq həmkarlar ittifaqı üzvü də yollayışlardan istifadə edib. Ümumilikdə ötən il 70 min nəfərdən artıq sosial sığorta ödəyicisi yollayışla təmin olunub. İlk həmkarlar ittifaqı təşkilatlarının öz üzvləri üçün təşkil etdikləri kütləvi gəzinti və istirahət nəzərə alınmaqla ümumilikdə istirahətə və müalicəyə göndərilənlərin sayı 100 min nəfərə yaxın olub:
"AHİK-in üzv təşkilatları da öz vəsaitləri hesabına inşa etdirdikləri müasir tipli pansionatlarda işçilərinin istirahətlərini təşkil edirlər. Məsələn, Rabitə İşçiləri Müstəqil Həmkarlar İttifaqının Nabran zonasındakı "Rabitəçi" istirahət mərkəzində mövsüm ərzində 450 nəfərə yaxın, Dəmiryolçuların Müstəqil Həmkarlar İttifaqının Nabrandakı "Lokomotiv" istirahət mərkəzində 1000 nəfər, Dövlət idarələri və İctimai Xidmət işçiləri Həmkarlar İttifaqının Nabrandakı "Ülfət" istirahət zonasında 1000 nəfərə yaxın, Təhsil İşçiləri Azad Həmkarlar İttifaqının Nabrandakı "Təhsil" istirahət mərkəzində 1500 nəfərə yaxın, Dəniz Nəqliyyatı İşçilərinin Həmkarlar İttifaqının "Dənizçi" istirahət mərkəzində 1900 nəfərə yaxın həmkarlar ittifaqı üzvü istirahət edir. Ötən ilin sonlarında Səhiyyə İşçiləri Həmkarlar İttifaqının Qusar rayonu ərazisində "Şəfa" istirahət mərkəzi istifadəyə verilib. Həmin istirahət mərkəzində də 1000 nəfərdən artıq həmkarlar ittifaqı üzvü istirahət edə biləcək.

Hazırda Mədəniyyət İşçiləri Həmkarlar İttifaqı da öz vəsaiti hesabına 2 hektar torpaq sahəsi alaraq, orada öz işçiləri üçün sağlamlıq-istirahət mərkəzi inşa etdirir. Daha bir müalicə-sağlamlıq ocağı - Metropoliten İşçiləri Həmkarlar İttifaqı Birliyinin nəzdindəki sanatoriya-profilaktoriya bu il də fəaliyyətini davam etdirəcək. Həmin sağlamlıq ocağında hər il 850 nəfər müalicə alaraq sağlamlığını bərpa edir. Sanatoriyaya bir ədəd yollayışın qiyməti 235 manatdır. Məcburi dövlət sosial sığortasına cəlb olunmuş şəxslər, yəni metropoliten işçiləri yollayışın dəyərinin 15 faizini, yəni 35 manat ödəməklə əldə etmək hüququna malikdirlər, lakin bu vəsaitin ödənilməsini də Metropoliten İşçiləri HİB öz üzərinə götürüb və işçilər yollayışları tam güzəştli olaraq, pulsuz əldə edirlər".

© Materiallardan istifadə edərkən hiperlinklə istinad olunmalıdır