Oteldə nigah kağızı tələb olunmalıdırmı? – NAZİRLİKDƏN AÇIQLAMA
13 MAY

Oteldə nigah kağızı tələb olunmalıdırmı? – NAZİRLİKDƏN AÇIQLAMA

Mədəniyyət və Turizm Nazirliyi mehmanxana rəhbərlərinə və turistlərə müraciət edib. Fins.az-ın məlumatına görə, müraciətdə bildirilir ki, son zamanlar mehmanxana və mehmanxana tipli obyektlər tərəfindən mehmanxanada qeydiyyatdan keçərkən tələb olunan müvafiq sənədlərlə bağlı Mədəniyyət və Turizm Nazirliyinə şikayətlər daxil olub.

Mehmanxanada gecələmək üçün sənəd rəsmiləşdirilməsi beynəlxalq qaydalarına və təcrübəsinə əsasən hər bir vətəndaş xüsusi forma – gəliş vərəqəsini doldurur və orada öz şəxsiyyət vəsiqəsinə dair göstəricilərini: soyadı, ad, doğum tarixi, daimi yaşayış yerinin ünvanı və s. qeyd edir. Həmin vərəqədə eyni zamanda mehmanxanada qalma qaydaları və rejimi də öz əksini tapır. Sənədə atılan imza onu təsdiq edir ki, mehmanxanada gecələyən turist, xidmət qaydaları və qiymətləri ilə tanış olub. Sonra vərəqədəki göstəricilər mehmanxananın qeydiyyat bankına daxil edilir və şəxsiyyəti təsdiq edən sənəd dərhal müştəriyə geri qaytarılır.

Mədəniyyət və Turizm Nazirliyi bildirir ki, mövcud qanunvericilikdə mehmanxanada qeydiyyatdan keçən zaman nikah haqqında şəhadətnamə tələb olunmur.

Mənbə: APA

© Materiallardan istifadə edərkən hiperlinklə istinad olunmalıdır