Nahid Bağırov: Novruz Bayramında İrandan gələn turistlərin sayı az olacaq
12 MART
447

Nahid Bağırov: Novruz Bayramında İrandan gələn turistlərin sayı az olacaq

Qarşıdan Novruz Bayramı gəlir. Bu ərəfədə ölkəyə üz tutacaq turistlərin sayı maraq doğurur. 
Nəzərə çatdıraq ki, hər il Novruz Bayramı ərəfəsi xüsusilə İrandan Azərbaycana istirahətə gələn turistlərin sayı üstünlük təşkil edir. 

Turizm.fins.az xəbər verir ki, Azərbaycan Turizm Assosiasiyasının rəhbəri Nahid Bağırov  Oxu.az-a açıqlamasında bildirib ki, hazırda ölkəyə nə qədər turistin gələcəyi ilə bağlı say göstərmək mümkün deyil:

“Bayram ərəfəsi artıq bu rəqəm bəlli olacaq. Lakin indidən görünən odur ki, İrandan gələn turistlərin sayında ötən illərlə müqayisədə azalma baş verəcək. Bu da həmin ölkədəki iqtisadi-siyasi proseslərlə bağlıdır.

Belə ki, İranda dolların məzənnəsi yüksəlib. Bundan əlavə, xaricə gedən hər turistdən alınan verginin məbləğinin dövlət tərəfindən qaldırılması yönündə fikirlər var. Bütün bunlar İrandan gələn turistlərin sayına təsir edib.

Nəinki Azərbaycanın turizm barında, digər ölkələrin bu sektorunda İrandan gələn turistlərin sayına azalma var”.

Məlum olub ki, martın 20-dən İran hökuməti xaricə səyahətə gedənlərə tətbiq etdiyi vergini artıracaq: 

“Belə ki, başqa ölkəyə hava nəqliyyatı ilə səfər edənlər 15 dollar deyil, 45 dollar, quru nəqliyyatı ilə səfər edənlər isə 7 dollar deyil, 15-20 dollar ödəməli olacaqlar”. 

N.Bağırov bazarda yaranan boşluğu Səudiyyə Ərəbistanı, Bəhreyn, Qətər və Rusiyadan olan turistlər hesabına tarazlaşdırmağa çalışacaqlarını bildirib.

Onun sözlərinə görə, hazırda ölkənin turizm bazarında ərəb ölkələrindən gələn turistlər üstülük təşkil edir.

Hotellərin qiymətlərinin bayram ərəfəsi necə formalaşacağına gəlincə, N.Bağırov deyir ki, ötən il Novruz Bayramı ərəfəsində hotellərin qiymətlərində artım baş vermişdi: 

“İran bazarı azaldığı üçün bu il qiymətləri endiriblər”.    

© Materiallardan istifadə edərkən hiperlinklə istinad olunmalıdır